පරිච්ඡේද
Type REG para and send the SMS to 77000 and get paranormal updates to your mobile phone!

නටනවට උඹට කවුරුත් පඩි ගෙවන්නේ නෑ, රොබර්ටෝ, ෆ්‍රැන්සිස්කෝ ගාර්සියා ඔහුගේ බෑණාට කීවේය. ඔහු ස්පාංඥ භාෂාවෙන් කතා කළේ රොබර්ටෝගේ කැසට් රේඩියෝවේ ශබ්දයද අභිබවමිනි. මතක තියාගනින්, දෙවියෝ බලාගෙන ඉන්නවා කියලා. ඔවුන් වැඩ කරමින් සිටි ගොඩනැගිල්ලේ සිවිලිමෙහි එල්ලී ඔවුන් දෙස මෑනී තිබූ ආරක්ෂිත කැමරාව දක්වමින් ෆ්‍රැන්සිස්කෝ කීයේය.

ගොඩනැගිල්ල වනාහී අයිඩහෝ පරෝපකාර රක්ෂණ භාරයට අයත් ගොඩනැගිල්ලක් වූයේය. උස් සිවිලිම් හා බබළන කිරුගරුඬ පොළවක් සහිත එම ගොඩනැඟිල්ල අයිඩහෝ හි ෆෙයාර්ෆීල්ඩ් නගරයේ විශාලතම බැංකුව වූයේය. සෑම රාත්‍රියකම ෆ්‍රැන්සිස්කෝ හා රොබර්ටෝ එක්ව එහි පොළව මදින්නෝ වූහ.

රේඩියෝවෙන් ඇසෙන ගීතයට අනුව තම මුස්නය සමඟ නර්තනයෙහි යෙදෙන්නාවූ රොබර්ටෝ දෙස බලාසිටීම ප්‍රීතියක් ගෙන දෙන බව ෆ්‍රැන්සිස්කෝට වුවද  පිළිගත හැකිව තිබුණි. තරුණයා පුංචි විනෝදයක් ලබමින් සිටියත් රොබර්ටෝගේ මාමණ්ඩියගේ අභිප්‍රාය වූයේ  බෑණා වැඩෙහි යෙදෙනු දැකීම වූයේය.

රස්සාව නැතිකරගෙන පලයන් ආපහු එල් සැල්වදෝර් කැළයකට, ඔහු රොබර්ටෝට දැඩි ලෙස කීවේය.

රොබර්ටෝ විරිත්තුවේය. ඔහු තව එක් වරක් කඩිනම් නර්තනයක යෙදෙමින් රේඩියෝව අක්‍රීය කර වැඩට බැස්සේය.

ෆ්‍රැන්සිස්කෝ තෘප්තිමත්ව නැවතත් ඔහුගේ මුස්නය ගෙන කිරිගරුඬ පොළව මත වූ කුණු දුහුවිලි සමග හැපෙන්නට වූයේය.

එක්වරම නුහුරු ගිගිරුම් ශබ්දයක් වාතලය පිරවීය.

කිරිගරුඬ ‍පොළව දෙදරන්නට වූයේය.

එල් සැල්වදෝරයේදී නම් ෆ්‍රැන්සිස්කෝට භූමිකම්පා හුරුපුරුදු ‍දෙයකි. එසේම යුධ හඬද එහි සාමාන්‍ය දෙයක් බවට පත්වී තිබුණි.

නමුත් මේ අයිඩහෝව විය. මෙහි භූමිකම්පා හෝ යුධ ගැටුම් වූයේ නැත. මෙය සාමය හා සතුට සහිත භූමියක් වූයේය. නමුත් මේ ශබ්දය ඇසෙද්දීම ඔහුට දැනුණේ එය යම් විපතක පෙරනිමිත්තක් ලෙසිනි.

එහි තවමත් ගිගිරුම් ශබ්දය වූයේ, එය වඩාත් හඬින් වඩාත් ළඟින් ඇසෙන්නට වූයේය.

නිරුපද්‍රිතව සිටිය හැකි ස්ථානයක් සොයමින් ෆ්‍රැන්සිස්කෝ ගොඩනැගිල්ලේ ඒ මේ අත බලන්නට වූයේය. සේප්පු ඇති ස්ථානය වඩාත් ආරක්ෂිත තැනක් විය හැකි වූ නමුත් එහි දැවැන්ත වානේ දොරවල් අගුළු දමා ඇති බව ඔහුට පෙණුනේය. සමහරවිටෙක කවුන්ටරය පසුපස ආරක්ෂිත විය යුතුය.

ඔහු එතැනින් ඉවත් වීමටත් පෙර බැංකුව ඉදිරිපස තිබූ සුවිසල් වීදුරුව පුපුරා ගියේය. වීදුරු කැබලි වලින් නැහැවීයත්ම ෆ්‍රැන්සිස්කෝ තම දෙඇස් වසා ගත්තේ නිරායාසයෙනි. ඔහුට තම කම්මුලෙහි දැඩි වේදනාවක් දැණුනි. එක්වරම සියල්ලම නිසළ වූයේය.



ඔහු සෙමෙන් හුස්මක් හරිමින් දෑස් හැර තම කම්මුල ස්පර්ශ කළේය. ඔහුගේ ඇඟිළිතුඩු ලෙයින් නැහැවී දිළිසුණේය. සීරීම් තුවාල හැරුණුවාට වැඩි යමක් ඔහුට සිදුවී තිබුණේ නැත. ඔහු තම බෑණා දෙස බැලුවේය. රොබර්ටෝ ආරක්ෂිතව සිටි නමුත් පත්ඉරුවක් සේ ගැහෙමින් සිටියේය. තමාද ගැහෙමින් සිටිනා බව ෆ්‍රැන්සිස්කෝට අවබෝධ වුණි. ඔහු කුරුසිය සටහන් කර ගත්තේය.

ඔහුට නැවතත් ගිගිරුම ඇසුණි. මෙවර එය වඩා ඈතින් ඇසෙමින් තිබුණි. එය ටිකින් ටික ඈතට යමින් තිබුණි.

ෆ්‍රැන්සිස්කෝ  වීදුරු කුඩු වැටී තිබූ කිරිගරුඬ පොළව මතින් ප්‍රවේසමෙන් ඉවතට පියමැන්නේය. ඔහු හා රොබර්ටෝ වීදුරුවේ කැඩීගිය විවරය අසළට පැමිණ පිටත බලන්නට වූවෝය.

දේව මෑණියනි. මේක නම් වෙන්න බැරි දෙයක්, ෆ්‍රැන්සිස්කෝ කීවේය.

නමුත් එය සිදුවෙමින් තිබුණි. දැවැන්ත කුළු ගෙඩියකින් පහර දුන්නාක් මෙන් වීදියේ තිබූ මෝටර් රථයක් පොඩිවී යන ආකාරය ඔවුහු දුටහ. පුවත්පත් විකුණන දැවමය කුටියක් ගිනිකූරු මෙන් කැබලි වී යන අයුරු ඔවුහු දුටහ.



නමුත් එය කරන ලද්දේ කුමක් විසින්දැයි ඔවුහු නුදුටහ.

බැංකුවට කඩා වැදුණු, මොටර් රථය පොඩිපට්ටම් කළ හා පුවත්පත් කුටිය සුණුවිසුණු කළ බලවේගය අදෘශ්‍යමාන එකක් වූයේය.

ෆ්‍රැන්සිස්කෝ හා රොබර්ටෝ මුහුණට මුහුණ බලා ගත්තෝය. ඔවුන් දෙදෙනා සිතන දේ කුමක් දැයි උහු දැන සිටියහ.

අයිඩහෝ වෙත පැමිණීම එතරම් බුද්ධිමත් ක්‍රියාවක් නොවේ යැයි සමහරවිටෙක ඔවුනට සිතෙන්නට ඇත. තම මවුබිමේදී අනතුර පැමිණෙන්නේ කොයි ආකාරයකින්දැයි ඔවුහු දැන සිටි නමුත් මෙහිදී එය එක්වරම පැමිණෙන්නේ අද්භූත හා භීෂණාත්මය ආකාරයෙනි.

-----------------------------------------------------------------------------------------------

රේ හයින්ස් අයිඩහෝ හී අමුත්තෙක් නොම වීය. ඔහු ‍එහිම ඉපිද හැදී වැඩුනෙක් වූයේය. ජනපදයේ උස්බිම් හා එහි ගිරි ශිඛර මධ්‍යයෙන් මහාමාර්ග ඉදිකිරීමේ කටයුතු වලට සහය දුන්නෙක් වීය. එදින රාත්‍රියේත් ඔහු තම කාර්යයේ තෘප්තිමත්ව යෙදී සිටියේය. ඉදිකිරීමේ සමාගම විසින් ෆෙයාර්ෆීල්ඩ් වෙතට සිවුමාවත් මහා මාර්ගයක් ඉදිකිරීමේ කඩිනමක සිටියේ එය අතිකාල දීමනා මංපෙතක්ද විවර කර දී තිබුණේය.

ගිගුරුම ඇසෙත්දී හයින්ස් සිටියේ තම පරිවාර කම්කරුවන් සමග විරාමයක කෝපි පානය කරමිනි.

ඔහු නිමකෙරෙමින් පවතින මහා මාර්ගයට එබී බැලුවේය.

මොන යකෙක්ද මේ? මුව අඩක් විවෘත කරගත්වනම සිට ඔහු කීවේය.

මාර්ගයේ එක් තීරුවක් බැරක්ක දමා තිබුණේ වාහන ධාවනය වැළැක්වීම සඳහාය. ඒවා බරැති දැවමුවා බැරැක්ක වුවද මේ මොහොත වනවිට ඒවා කඩදාසි මෙන් ඉවතට විසිවෙමින් තිබුණේය. ඒවා එකින් එක කඩා වැටෙමින් තිබුණි.

යම් දැවැන්ත ශක්තියක් මාර්ගය දිගේ පැමිණෙමින් තිබුණි.

හයින්ස්ට එය සුළි කුණාටුවක්දෝයැයි සිතුණත් සුළඟක සේයාවක්වත් එහි වූයේ නැත.

ඔහුට කිසිදු දෙයක් පෙණුනේත් නැත.

ඔහු එම ශක්තියෙහි වැදී ඉහළ අහසෙහි පියාඹා යද්දීත් ඔහුට ඒ කුමක්ද යන්න පිළබඳ නිනව්වක් වූයේ නැත.

තම ඇස් කොණින් හයින්ස් දුටුවේ තම කෝපි ප්ලාස්කුවද ඉහළ අහසේ කෝපි විසුරුවමින් තිබෙන බවය.

ඔහු අවසන් වරට දුටු දෙය එයම විය.

ඔහුගේ සිරුර ඔහු විසින් නිමකරන ලද මාර්ග කොටසක පතිත වූයේය. ඔහු විසින් අවසන් වරට නිමකරන ලද මාර්ගය එය වූයේය.

රේ හයින්ස් කෝපි සඳහා ගත් විරාමය සදාකාලික එකක් බවට පත්විය.


මහා මාර්ගයේ සැතැපුම් තිහක් ඈතට වන්නට වෙස්ලි බෘවර් ලෑල්ලටම පාගමින් සිටියේ අළුතින් ඇතිරූ මාර්ගයේ පහස විඳිමිනි. සෑම මාර්ගයක්ම මෙසේ වේ නම් තම සුවිසල් ලොරිය පදවන කාරණය කජු කන්නාක් මෙන් වනු ඇති බව ඔහුගේ අදහස විය. විශේෂයෙන්ම ඔහු බරක් පටවාගෙන නොයන අවස්ථාවලදී ඔහුට වේගයෙන් රිය පැදවිය හැකිවනු ඇත. බෘවර්ට අනුව නම් එය විදගෙන යාමක් වනු ඇත.

එය දීර්ඝ රාත්‍රියක් තිස්සේ පැද යාමක් වී තිබිණ.  බෘවර් ඈනුමක් හරිමින්ම කෙටිකථන පණිවිඩ සේවාව ක්‍රියාත්මක කළේය.

මේ වෙස්ලි බෘවර් මාර්ග අංක හතෙන්, ඔහු පැවසුවේය. බඩු පටව ගන්න අටට එන්න පුළුවන් වෙයි ගොඩක් වෙලාවට.





ඔහු නිදිගැට කඩමින් පිළිතුරක් අපේක්ෂාවෙන් සිටියේය.

එක් වරම ඔහුගේ දෑස මහත් ලෙස ඇරී ගියේය.

ඔහුගේ නින්ද ගව් ගණනක් දුරට පළා ගොස් තිබුණි.

අඩි සියගණනක් ඔහුගේ ඉදිරියෙන්ම වූයේ ඔහු මීට කලින් සර්කස් දැන්වීමක පමණක් දැක තිබූ දසුනකි.

ඒ සුවිසල් හස්තියෙකි.

මේ හස්තියා දැන්වීමක සිටිනා එකෙක් නොවූයේය.

ඌ ඔහු ඉදිරියට පැමිණෙමින් සිටියේ පහරදීමටය.

බෘවර් තිරිංග තද කරමින් ප්‍රාර්ථනා කළේ එය ඉක්මනින් නතර වේවා කියාය.

ලොරි රථය ලිස්සමින් පාලනයෙන් ගිලිහී ගියද අවසන එය නතර වූයේය.

හස්තියාද නතර වූයේය.

සුවිසල් යන්ත්‍රයද සුවිසල් හස්තියාද අඟල් ගණනක පරතරය සහිතව මුහුණට මුහුණලා තිබුණේය.




හස්තියාගේ ගිනිගත් දෑස් දෙස බෘවර් බලා සිටියේය. තර්ජනාත්මකවූ තිරශ්චීන දළ යුගලයේ උල් කෙළවරයන් ඔහුට පෙනෙන්නට වූයේය. හස්තියාගේ අළු පැහැති හොඬවැලෙන් ඔහුගේ ලොරි රථයේ ඉදිරි වීදුරුවට ඌ පහරදෙනු ඔහු බලා සිටියේය.

කෙටිකථන පණිවුඩ සේවාවෙන් මන්ද්‍ර ස්වරයෙන් යමක් අසුණේය. මට ආයෙමත් කියන්න එන්න පුළුවන් වෙලාව. බෘවර්? බෘවර් ඇහෙනවද?

පිළිතුරක් දීමට බෘවර් සිතුවේ නැත. ඔහු දෑතින්ම සුක්කානම බදා සිටියේය. හස්තියා හැරෙනු දුටු කල්හි ඒවා මඳක් ලිහිල්වි ගියේය. වල්ගය කෝපයෙන් දෙපසට වනමින් මාර්ගයේ හිරු බැස යමින් තිබූ දෙසට ඌ සෙමෙන් යන්නට වූයේය. ඉන්පසු එක්වරම විදුලිය වැදුනාක් මෙන් ඌ දුවන්නට පටන් ගත්තේය. සුවිසල් සත්වයෙක්ට නොතරම් ආකාරයෙන් ඌ දිවගිය වේගය විශ්වාස කළ නොහැකි තරම් විය.

මාර්ගයේ වංගුවකින් ඌ නොපෙනී යන අයුර බෘවර් බලාසිටියේය. ඔහු තම හෘද ස්පන්දනය යථා තත්වයට පත්වන තුරු මඳක් ඉවසුවේය. ඉන් පසු ඔහු කෙටිකථන සේවාවට ඇමතුවේය. මම දන්නවා ඔයගොල්ලෝ විශ්වාස කරන එකක් නෑ මේක ඒත්-

-----------------------------------------------------------------------------------------------

පොලීසිය විසින් හස්තියා මර්දනය කළ අවස්ථාව වන විට ක්ෂිතිජ‍යෙන් හිරුබැස ගොස් තිබුණි. එය අමාරු කර්තව්‍යයක් වී තිබුණේ නැත. හඹා යෑමක් සිදුවී තිබුණේ නැත.

හස්තියා දුටු යතුරුපැදිකරුවකු විසින් පොලිසියට දන්වා තිබුණි.

පොලිස් රථ සයිරන් නළා හඬවමින් හදිසි අනතුරු ආලෝක දල්වමින් පැමිණෙත්දී ඌ මහා මාර්ගයේ සිටි තැනම වැතිරී සිටියේය. තවත් වාහන එතැන වූයේය. මිනිසුන්ද, කාන්තාවන්ද, කුඩා දරුවන්ද, ඇද වැටුණු සද්දන්තයා නැරඹීමෙහි උත්සුක වී සිටියහ.




පස්සට වෙන්න!” පොලිස් නිළධාරියෙක් රැස්කකා සිටි ජනතාවට විධාන දුන්නේය. ඌට තාම පණ තියනවා. ඒ වගේම අනතුරුදායකයි.

හස්තියා තවමත් ජීවත්වන බව පෙනී ගියේය. නමුත් ඒ යන්තමිනි.

සත්වයා වේදනාවෙන් හුස්ම ගත්තේය. උගේ ශරීරය දුර්වල ලෙස මාර්ගය සිපගෙන තිබුණේය. ඌ නැඟිටීමට මහත් තැතක් දැරුවේය.

හස්තියාගේ උත්සාහයන් නිසා උගේ සියළු ශක්තිය වැයවී ගිය බවක් දක්නට ලැබුණී. ඌ පොළවට ඇද වැටුණි. මඳ වේලාවක් ගැස්සෙමින් සිට ඌ එක්වරම නිශ්චල වූයේය.

අම්මේ, අම්මේ, ඌ නිදා ගත්තද? කුඩා පිරිමි ළමයකු ඇසුවේය.

කුඩා ළමයා මව දෙස හිස ඔසවා බලන විට මව තොල් සපා ගත්තාය. ඔව් පැටියෝ, ඌ නිදාගත්තා, ඇය සහතික කළාය.

කුඩා පිරිමි දරුවාගේ වැඩිමල් සොහොයුරිය ඇද වැටුණු හස්තියා දෙසට ළං වී බැලුවාය.

සත්වයා දෙස දිගුවේලාවක් බලා සිටීමට තරම් ඇය වැඩිමහළු දැරියක වූවාය.



තමා දුටු දෙයින් හඬා වැටීමට තරම් වැඩිමහළු වයසක ඇය වූවාය.  




Type REG xfiles & send the SMS to 77002 & get our updates to your mobile phone!




හම්ෆ්‍රීස් කැළය තුළින් වේගයෙන් ඇවිදයන ශබ්දය කෙමෙන් වියැකී ගියේය. ඔහු යන්නටම ගොස් තිබුණි.

මුවර් නැවතත් ලී කොටය දෙසට හැරුණේය.

අපි බලමු ඉර බැහැලා යන්න ඉස්සෙල්ලා අපිට මොනවද හොයාගන්න පුළුවන් කියලා, ඔහු කීවේය.මම මේකේ මදේ හාරලා සාම්පලයක් ගන්නම්. අපිට ඒක කඳවුරේදී පරීක්ෂා කරන්න පුළුවන් වෙයි.

ඒක නම් හොඳ අදහස, මොල්ඩර් කීවේය. කහ පාට කොටස පරීක්ෂා කළොත් අපිට ගොඩක් දේවල් දැන ගන්න පුළුවන් වෙයි මගේ හිතේ.

මාත් එහෙම හිතනවා, ස්කලීද කීවාය. මේ දක්වා හොයාගෙන තියෙන්නේ පිළිතුරු වලට වඩා ප්‍රශ්න තමයි.

ස්පිනී හිස දෙපසට වැනුවේය. ඔයගොල්ලෝ ඉතින් මම කියන එක අහන්නේ නැද්ද? මම දැක්ක දේවල් දැක්ක නම් විශ්වාස කරන එකකුත් නෑ. මට තියෙන්නේ එක ප්‍රශ්නයයි. විදුලිජනක යන්ත්‍රයට ඇති තරම් ඉන්ධන තියනවද අපිට රෑ ගත කරන්න?

ඔවුන් නැවත කඳවුරට පැමිණි කල්හි ස්පිනී ඔවුන් ඇමතුවේය. මම යනවා විදුලිජනක යන්ත්‍රයට ඇති තරම් ඉන්ධන තියනවද කියලා බලන්න.

අන් අය මුවර් පසුපසින් කැබින් කාමරයට පැමිණියෝය. දිගු පැන්සලක ප්‍රමාණය ඇති සිලින්ඩරාකාර දැව සාම්පලය ඔහු මේසය මතින් තැබුවේය. ඉන්පසු එක් ඇසක් වසාගෙන කුඩා අණ්වීක්ෂයකින් එය පරීක්ෂා කළේය. මේක හරි අමුතුයි, ඔහු කීවේය.



මේ දවස් ටිකට අමුතු නොවන මොනවද හම්බ උනේ? ස්කලී කීවාය. ඔයා විහිළු කරනවා මම හිතන්නේ.

ඒ මොකක්ද? මොල්ඩර් ඇසුවේය.

මේ කහ පාට කොටස, මුවර් කීවේය. ඒකේ මුකුන්ද සත්තු වගයක් ඉන්නවා වගේ. පුංචි කෘමියෝ වර්ගයක්. මට නම් හිතාගන්න බෑ.

මොකද බැරි? ස්කලී ඇසුවාය. ගස්වල කොහොමත් කෘමියෝ ඉන්නවා තමයි.

ඇත්ත, මොල්ඩර්ද කීවේය. මේ කෘමියගේ මොකක්ද තියන අමුත්ත?

කෘමියෝ ගහක් ආක්‍රමණය කරන්නේ එක එක විදිහට වෙන්න පුළුවන්, මුවර් පැහැදිලි කළේය. ඒත් හැම වෙලාවෙම උන් ගහේ ජීවී කොටස් තමයි ආක්‍රමණය කරන්නේ. කොළ, මුල්, අළුත හැදෙන කඳ කොටස්.

සමහර විට මුන් කඳ විදින වර්ගයකට අයිති උන් වෙන්න ඇති, මොල්ඩර් අනුමාන කළේය.

මේච්චර ඇතුළේ මුන් ජීවත් වෙන්න විදිහක් නෑ, මුවර් කීවේය. ආ මෙන්න. ඔහේම පරීක්ෂාකරලා බලන්න. ඔහු අණ්වීක්ෂය මොල්ඩර් අතට පත් කළේය.

මොල්ඩර් එය හොඳින් පරීක්ෂා කර බැලුවේය. මුවර් කියන්නේ කුමක්දැයි ඔහුට වැටහී ගියේය. කහ පැහැති දැව කොටසේ දඟළමින් සිටියේ ගණන් කළ නොහැකි තරමේ ඉතා කුඩා ගුල්ලන් වැනි සත්ව විශේෂයකි. ඒ මයිටාවන් පියවි ඇසින් දැකිය නොහැකි තරමේ කුඩා උන් වූහ. මොල්ඩර් එවන් ආකාරයක මයිටාවන් කිසිදා දැක නොතිබුණාක් මෙන්ම උන් ඉතා ක්ෂුද්‍ර මකුළුවන් ආකාරයෙන් ඔහුට පෙනී ගියේය.







සමහරවිට මේ දැව කොටසේ වෙනසක් ඇති, මොල්ඩර් කීවේය. මුන් මේ කොටස ආහාරයට ගන්නවා වගේ. ස්කලී පොඩ්ඩක් බලන්න. සමහර විට ඔයා දන්නවා ඇති මුන් ගැන.

ඔහු අණ්වීක්ෂය ඇය අතට පත් කළේය.

ඇය එය අසීරුවෙන් මෙන් පරීක්ෂාකර බලා හිස දෙපසට වැනුවේය.

මුන් ගැන කවදාවත් මම ඉගෙනගෙන නෑ, ඇය කීවාය. ඔයාට අඳුරගන්න පුළුවන්ද? ඇය මුවර්ගෙන් ඇසුවාය.

මුන්, ලී මයිටාවෝ වර්ගයක් වෙන්න ඇති, මුවර් කීවේය. ඒත් මම මීට කලින් දැකලා නෑ. මට ඇත්තටම පැහැදිලි නිගමනයක් නෑ.

මට ඇත්තටම පැහැදිලි නිගමනයක් නෑ. එම වාක්‍යය ඇසූ මොල්ඩර්ගේ දෑස් දීප්ති‍මත් වූයේය. ඒ මන්දැයි ස්කලී දැන සිටියාය. ඔහු තම ක්ෂේම භූමියට අවතීර්ණ වී සිටියේය. එය ඔහුගේ ප්‍රියතම දඩබිම වූයේය. එය එක්ස් ෆයිල්ස් අඩවිය වූයේය.

උන්ට පුළුවන්ද ඒ ගහේ අවුරුදු සිය ගණන් ජීවත් වෙන්න? ඔහු ඇසුවේය. සමහරවිට ඊටත් වැඩි කාලයක්?

මම දන්නෑ කොහොමද කියලා, මුවර් කීවේය. කහපාට කොටස තිබුණේ මදයට ළඟින්. ගහක් ජලය සපයන්නේ ඒකේ බාහිර මුදු වලට විතරයි. කෘමීන්ට ජලය නැතුව ජීවත් වෙන්න බෑ.

ඒ අපි දන්න කෘමීන්ටනේ, මොල්ඩර් කීවේය.

‍ඒ අතර ස්කලී තවදුරටත් අණ්වීක්ෂයෙන් දැව කොටස පරීක්ෂාවෙහි නිමග්න වූවාය.

පේන විදිහට නම් මුන් මේකේ පැටවු ගහලා වගේ, ඇය කීවාය. සමහරවිට මේ සාම්පලය ගත්ත එකෙන් උන්ට බාධාවක් වුනා වෙන්න පුළුවන්.

උන්ට කෝෂයක් හදන්න පුළුවන්ද? දොර දෙසින් කටහඬක් ඇසුණේය. ඒ ස්පිනී විය.

හොඳයි දැන් මේ අහන්න නීතිගරුක මහත්වරුණි, ඔහු ඔවුනට කීවේය. මම මේ කැළේ ඉන්නේ සෑහෙන කාළෙක ඉඳන්. මේ ගස් මම අඳුනන්නේ මගේ යාළුවෝ වගේ. මෙහේ වෙන්නේ මොකක්ද කියලා මම දන්නවා.

හරි, මොකක් වෙනවා කියලද ඔහේ කියන්නේ එහෙනම්? මුවර් ඇසුවේය.

මම කියන්නම් මේ ගස් නින්ජා කියන දේ අහනවානම් විතරක්, ස්පිනී කීවේය.

මේ අහනවා ස්පිනී, මුවර් කීවේය. දැන් සෙල්ලම් කර කර ඉන්න වෙලාවක් අපිට ඉතුරු වෙලා නෑ.

ඔහේ කියන එක් ඇත්ත තමයි, අපිට වැඩි කාලයක් ඉතුරුවෙලා නෑ තමයි, ස්පිනී කීවේය. ඔහුගේ කතාවේ සරදම් ස්වරයක් ගැබ්ව තිබුණේ නැත. රාත්‍රිය එළඹීම ඔහු කිසිලෙසකත් සරදමට ගත්තේ නැත. අර ගහ කැපුවට පස්සේ මගේ යාළුවා ටීග් මැරුණා, ඔහු ඔවුනට කීවේය. ඊට පස්සේ ලී කපන අයත් අතුරුදහන් වුනා.

ඔයා හිතන්නේ මේ මයිටාවෝ ඒ අයව මැරුවා කියලද? ස්කලී ඇසුවාය.

සමහරවිට මුන් අවුරුදු සියගණන් තිස්සේ නිද්‍රාවකට වැටිලා ඉන්න ඇති, ස්පිනී කීවේය. සමහරවිට අවුරුදු දහස් ගණනක් තිස්සේ. උන් ඇහැරුණ ගමන් බඩගිනි වෙන්න ඇති.

ස්පිනී මඳකට නැවතුණේය. කිසිවෙක් කිසිවක් නොකීවේ ඔවුන් සියල්ලෝම ඔහු කියූ දේ පිළිබඳව කල්පනා කරමින් සිටි බැවිනි.

ස්පිනී මුවගින් සිනාසුණේය. ඇත්තටම මට හම්ෆ්‍රීස් නැතුව නිකං පාළුයි වගේ. මිනිහා කොටළුවෙක් වගේ හිනාවෙන සද්දේ ඇහෙන්නේ නැතුව මගේ කණ අඬනවා වගේ. මම කල්පනා කරන්නේ මිනිහා තාමත් හිනා වෙවී ඉන්නවද කියලා.



සැතැපුම් කිහිපයක් දුරින් සිටි ස්ටීව් හම්ෆ්‍රීස් සිනහසෙනවා වෙනුවට සාප කරමින් සිටියේය..

ඔහු මාර්ගයට අවතීර්ණ වූ වේලේ ඉර එළිය තිබුණත් එය වේගයෙක් වියැකී යන බවක් දක්නට ලැබුණේය.

ට්‍රක් රථය, ඔවුන් අත්හැරිය තැනම තිබෙණු දක්නට ලැබුණේය. ඔහු පුපුරා ගොස් ඇති ටයර් දෙක දෙස බැල්මක් හෙළුවේය. ටයර් වළල්ලෙන් ගමන් කිරීමෙන් එය තවත් විනාශ වනු සත්‍යයක් වුවත් අඩුම තරමේ ඒ මඟින් හෝ ඔහුට කැළයෙන් පිටතට යා හැකි වනු ඇත.

ඔහු රියදුරු අසුනට ඇති දොර විවෘත කළේය. ඔහු තම තුවක්කුව අනෙක් ඉදිරි අසුනට විසිකළේය. සුක්කානම ඉදිරියෙන් නැඟ රථය පණ ගැන්වීමට යතුර කරකවන්නට අතදැම්මේය.

ඔහුගේ අතට කිසිවක් හසුවූයේ නැත.

මඟුලක්ද, ඔහු මිමිණුවේය. කෝ මේක?

ඔහු උඩින් ඇති හිරුකිරණ ආවරණය තුළ එය ඇත්දැයි බැලුවේය. එහිද නැත. ඉදිරියෙන් ඇති රාක්ක වල බැලුවේය. එහි තිබුණේද නැත.

ඔහු ජනේලයෙන් පිටත බැලුවේය. අවසන් හිරුකිරණත් ගිලිහී යමින් තිබුණි.

ඇති යන්තන් මේක හරි තියනවා, ඔහු තමාටම කියා ගත්තේය. ඔහු ඉදිරි රාක්කයෙන් විදුලි පන්දමක් පිටතට ගත්තේය.

ඔහු එය පත්තු කළේ අඳුර වැටෙත්දීමය.

ඔහු එය ජනේලයෙන් පිටතට එල්ල කළේය. රාත්‍රිය කෙතරම් දැඩි වූයේද යත් විදුලිපන්දමේ එළියෙන් වූයේ අල්ප සහායකි.

නමුත් එය ප්‍රමාණවත් වනු ඇත. එය තමා කරන කර්තව්‍යයේ තරමට හෝ ප්‍රමාණවත් වනු ඇත. ඔහු එන්ජිම අතින් ක්‍රියාත්මක කරනු ඇත. ඉන්පසු ඔහු මේ සාපලත් වනයෙන් පිටතට යනු ඇත.

ඔහු ඩෑෂ්බෝඩයේ යටින් යමක් කිරීමට පටන් ගත්තේය. තමන් ගැන බලා ගැනීමේ ප්‍රවීණයෙක් වීම පිළිබඳ ඔහු තෘප්තිමත් වූයේය. ඔහු වියට්නාම යුධ වීරයෙක් නොවේ. ඔහු එයට නොතේරීම ඔහුගේ අඩුපාඩුවක්ද නොවේ. තම බිරිඳ දරුවෙකු අපේක්ෂාවෙන් සිටීම එයට හේතුව වූයේය. නමුත් ඒ ඕනැම යුධ වීරයකුගේ, පණ බේරාගැනීමේ ශිල්පීය ක්‍රම සංසන්දනය කිරීමේදී තමන් සමඟ ළඟින් වත් යන අයුරු කෙසේදැයි දැකීමට ඔහු සතුටින් පසු වූයේය. ඔහු ලෝකය යන අත මනාව දැන සිටි අයෙක් වූයේය. මෙහි කැළෑ නීතිය වූයේය. සුනඛයා තම පැටවුන්ම ආහාරයට ගනී. ශක්තිමත්ම කෙනා ඉතිරි වෙයි. දුර්වලයෝ කා දමනු ලැබෙති.

ඔහු පණගැන්වීමේ වයරයන් අල්ලා ගෙන සිටියේය. දැන් හරි ය, කිසිදු අපහසුතාවක් නැත. ඔහු සිනාසුනේය, ඉන්පසුව වයර් දෙක එකට ගැටුවේය. එය ගිනි පුළිඟු විසි කරත්දී ඔහුගේ සිනහව පුළුල් වී ගියේය. එන්ජිම පණ ගසනු ඔහුට ඇසුණේය. එය වරක් දෙවරක් පණ ගැන්වුණේය.

ඉන්පසු එය නැතිවී ගියේය.

මොන මඟුලක්ද, ඔහුට සිතුණි. තෙතමනය නිසා එය සිදුවනු ඇතැයි ඔහු සිතුවේය. ඔහු නැවත වරක් උත්සාහ කළේය. නැවතත් වයර් තුළින් ගිණි පුළිඟු පැන්නේය. එන්ජිම නැවතත් හඬ නැඟුවේය. වරක් දෙවරක් තෙවරක් හඬ නැඟුවේය.

නැවතත් එය නිසළ වුණේය.

ඔහු ට්‍රක් රථයෙන් පිටතට පැමිණියේය. ඔහු එන්ජිම ‍පරීක්ෂා කිරීමට බොනට්ටුව විවෘත කළේය. ඔහු විදුලි පන්දම එල්ල කරමින් එන්ජිම පරීක්ෂා කළේය. ඔහු දෝෂය සොයා ගත්තේය. එය සැකසුවේය. ඉන්පසු-

හ්ම්ම්ම්ම්ම්ම්ම්ම්ම්ම්ම්ම්ම්ම්.

ගුම් නාදයක් කැළය දෙසින් පැමිණියේය. එය වැඩිවෙමින් පැමිණ නැතිවී ගියේය.

ඔහු කෙළින් වුණේය. ඔහු ශබ්දය ආ දෙසට විදුලි පන්දම එල්ල කළේය.

ඔහු කිසිදෙයක් දැක්කේ නැත. එහි වූයේ වෘක්ෂයන් පමණි. හුදෙක් නිමක් නැති තරම් වෘක්ෂලතා පමණි.

ඔහු ට්‍රක් රථයේ වූ තුවක්කුව අතට ගත්තේය. එය ගස් දෙසට එල්ල කළේය.

ගුම් නාදය නැවතත් ඇසෙන්නට වූයේය. නමුත් මෙවර එය ඇසුණේ වෙනත් දිශාවකිනි.

තුවක්කුව අතකින්ද, විදුලි පන්දම අතකින්ද ගෙන ඔහු වටේටම කැරකුණේය.

ගස් ගෙම්බෝ ටික වරෙල්ලා එළියට, ඔහු කෑ ගසා කීවේය. උඹලා මාව බය කරන්න හිතුවා මදි. උඹලා කරන කියන දේවල් මම හොඳට දන්නවා.

එහි වූ එකම පිළිතුර ලෙසින් ගුම් නාදය වඩාත් උස්ව ඇසෙන්නට වූයේය.

ඉන්පසු හම්ෆ්‍රීස්ගේ මුව එල්ලා වැටිණ. විදුලි පන්දම ඔහු අතින් ගිලිහී ගියේය.




ඔහු එය අහුලා ගැනීමට ඉක්මන් වූයේ නැත. ඔහුට අවශ්‍ය ආලෝකය ඕනෑවටත් වඩා එහි තිබුණේය. වනයේ කොණක් ආලෝකයෙන් පිරී ගොස් තිබුණි. එය කොළ පැහැති එකක් වූයේය. එය අධික දීප්තිකර එකක් වූයේය. එය තුරු හිස් ඉහළ අහසේ රැඳී තිබුණේය.

විවර වූ මුවින් ඔහු බලා සිටියදීම ඒ දීප්තිමත් වළාව දිදුළන ඉඳිකටුතුඩු මෙන් වෙන්වී ඔහු දෙසට ඇදී එන්නට වූයේය.

හම්ෆ්‍රීස් තම කාණු දෙකේ තුවක්කුවෙන් ඒ දෙසට වෙඩි තබන්නට පටන් ගත්තේය.

වෙඩි හ‍‍ඬේ නින්නාදයෙහි ගුම්නාදය ගිලී ගියේය.

ඔහු තුවක්කුව පසෙකට විසි කරමින් ට්‍රක්රථයට වැදී දොර වසා ගත්තේය. ඔහු ජනේලද වසා දැම්මේය. ඔහු නැවත වරක් පණගැන්වුම් වයර එකට හා කරන්නට උත්සාහ කළේය.

එන්ජිම වරක් දෙවරක් ගැස්සී එක්වරම ක්‍රියාත්මක වුණේය.

යං පුතා යං, හනු තද කරගනිමින් ඔහු බලවත් සේ කීවේය. ට්‍රක් රථය බේබද්දෙකු මෙන් පැද්දෙමින් එහි බුන්වූ ටයරයන්ගෙන් ගමන් කිරීම ආරම්භ කළේය.

ජනේලයෙන් පිටත බලද්දී ඔහු දුටුවේ ළං ළං වෙමින් එන කුඩා කොළ පැහැති ආලෝක ධාරාය. ඒවා පැමිණ ජනෙල් වීදුරුවේ ගැටෙන අයුරු ඔහුට දක්නට ලැබිණ.

යම් ආකාරයක කෘමියෙකි, ඔහුට සිතුණේය. අඳුරෙහි කොළ පැහැයෙන් දිදුළන්නාවූ කෘමීන් විශේෂයකි.

නමුත් ඔහු ඉක්මනින්ම උන්ගෙන් ගැලවෙනු ඇත. ඔහු ඉතා ඉක්මනින්ම මෙයින් මිදී-

ආහ්හ්හ්හ්හ්හ්!

තම අත යමෙක් සපාකනවා දැණුනු කල්හි ඔහුට කෑ ගැසුණේය.

ඉන්පසුව ඔහු දුටුවේ රථයේ වායු කුටීර තුළින් රිංගා පිරෙන කෘමීන්වය.




ඔහු බලාසිටිත්දීම රථය ඇතුළත උන්ගෙන් පිරුණේය. උන් ඔහුව වසා ගත්තේ නිරාවරණය වී ඇති සමෙහි සෑම කොටසක්ම වැසී යන පරිද්දෙනි. ඔහුගේ අත්, මුහුණ, බෙල්ල, ඔහු එය වැළැක්වීමට නිරර්ථක උත්සාහයක් දරද්දීත්, උන් සපමින්, තුවාල කරමින් රත්වූ තුඩු අනින්නාක් මෙන් ඔහුව ග්‍රහණයට ගත්තේය.

බේරියන්! ඔහුගේ සිත කෑගැසුවේය. ඔහු දොරෙහි අඬුව කැරකුවේය. එය සිරවී තිබුණේය.

එයින් පිටවීමේ වෙන යම් මගක් තිබුණේ නැත.

තිබුණේම නැත.

නැත-

ආහ්හ්හ්හ්හ්හ්හ්! දෙවියනේ!... අම්මෝ!...
ඔහුගේ අවසන් සජීවී හඬ, අන්ධකාරය තුළ රජ කරන ගුමු නාදය සමඟ මුසුවී ගියේය.




ඊළඟ දිනය උදාවන විට හම්ෆ්‍රීස් උදම් අනමින් සිටියේය. කණ්ඩායමේ සියළු දෙනාම පාහේ උදෑසන කෑම මේසයට වාඩි වී සිටියේ මුවර් විසින් පිළියෙළ කළ කෝපි හා පෑන් කේක් බුදිමින්ය.

ආ ස්පිනී, හම්ෆ්‍රීස් ඔහුව ඇවිස්සුවේය. කෝ අර මහසෝනා හරි රීරි යකා හරි මාව කන්ඩ එනවා කියපු? අඩුම තරමේ මෝහිණි වත් දැක්කේ නෑනෙ. මොකද දන්නේ නෑ හේතුව.

මේ අහනවා හම්ෆ්‍රීස්, ස්පිනී පිළිකුළෙන් යුතුව කීවේය. මම ඔය වගේ කයිවාරු කාරයෝ දැකලා තියෙනවා වියට්නාම් යුද්ධයෙදී. රෑට කල්ලි ගැහිලා කැළෑවට යනවා. ඊට පස්සේ හිනා වෙවී එනවා වීරයෝ වගේ. එක රාත්‍රියක ඒ අය ආවේ නෑ. අපිට තමයි වුණේ ඒ අය හොයන්නයි ඒ අයගේ මිනී එකතු කරලා මළුවල දාලා මෙහෙට එවන්නයි.

ඔහේ වියට්නාමයේ හිටියද? මුවර් ඇසුවේය. වනාන්තර සේවා නිළධාරියා පුදුමයට පත්වූ සෙයක් දක්නට ලැබිණ. මම දැනන් හිටියේ නෑනෙ.

ඔව් මම හිටියා, ස්පිනී කීවේය. මම මහ කාළකණ්නියෙක්. එහේ කැළේට වස දාද්දි මාත් ඒකට හවුල් වුණා. ඔහේට මතකද ඒජන්ත ඔරේන්ජ්ව? ඊට පස්සේ මම දැක්කා ඒකෙන් කැළේ ගස් වලට වෙච්ච දේ. ඒ වගේම මිනිස්සුන්ට. මට වාවන්නේ නැති වුනා. මම දිවුරුවා මම ඒකට හරි යන්න දෙයක් කරනවා කියලා. මම මේ මිහිතලය විනාශ වෙන ඕනෑම දෙයකට එරෙහිව සටන් කරනවා ඒක මට තවත් ආකාරයක යුද්ධයක් වුණත් මම ඒක කරනවා.

මමත් වියට්නාම් වල හිටියා, මුවර් කීවේය. මම නම් ආඩම්බරයි ඒ ගැන. මම මගේ සේවය රටට ඉටු කරා. මගේ රටේ ජීවය ආරක්ෂා කරන්න. ඒකේ නීතිය ආරක්ෂා කරන්න. හරියට දැන් කරනවා වගේ.

ඔහේ ඔහේගෙ රටට සේවය කරන්න, ස්පිනී කීවේය. මම මගේ රටට සේවය කරන්නම්

රටවල් දෙකක් නෑ. එක රටයි තියෙන්නේ, මුවර් කීවේය.

එහෙම හිතාගන්නකෝ, ස්පිනී අවඥාවෙන් කීවේය.

හිතාගන්න දෙයක් නෑ, ඒක එහෙම තමයි, මුවර් පිළිතුරු දුන්නේය.

මිනිසුන් දෙදෙනා වාද කරන අයුරු දෙස ස්කලී බලා සිටියාය. වියට්නාම් යුද්ධය අවසන් වී තිබුණේ ඇය කුඩා දැරියක්ව සිටියදීය. නමුත් මේ දෙදෙනාට අනුව නම් එය තවමත් සිදුවන එකක් ලෙස පෙනී යමින් තිබුණි. ඔවුන් දෙදෙනාට නම් එය කිසිදා අවසන් නොවන යුද්ධයක් වී ඇති බව ඇයට හැඟී ගියේය.

මොල්ඩර් ඇයගේ සිතුවිලි කියවමින්දෝ එයට මැදිහත් වුණේය. වියට්නාමේ අමතක කරමු. අපි දැන් ඉන්නේ වෙනම යුද්ධයක. වෙනම හතුරෙක් එක්ක. දැන් අපි හැමෝම ඒකේ කොටස් කාරයෝ වෙලා ඉන්නේ. මම හිතන්නේ අපි මේ කැළේ ඇතුළට ගිහිල්ලා නැතිවෙච්ච මිනිස්සු ගියේ කොහෙද ඒ ගොල්ලන්ට උනේ මොකක්ද කියලා හොයන එක වඩා හොඳයි කියලා. අපිට දවල් කාලය නාස්ති කරන්න බෑ.

මම නම් කියන්නේ අපිට තව මොන කාලයක් වත් නාස්ති කරන්න බෑ, හම්ෆ්‍රීස් කීවේය. මේ අවට ගස් කොළන් ඇරෙන්න වෙන කිසිදෙයක් නෑ. මේ පිස්සා, මින්ස්සුන්ටත් වඩා වටිනවා කියන ගස් තමයි මේ අවට තියෙන්නේ. මේ මිනිහව මිනීමැරුම් චෝදනා එල්ල කරලා අරන් යන්නයි දැන් ඕන කරලා ති‍යෙන්නේ.

හම්ෆ්‍රීස් මුවර් දෙසට හැරුණේය. මේ අහන්න ලැරී. මොකද හිතන්නේ මේ ගස් නින්ජව ජනාවාසයට අරන් ගිහිල්ලා මිනිහට සුදුසු බලුකූඩුවට මිනිහව දාන එක ගැන?

මුවර් හම්ෆ්‍රීස් දෙස මධ්‍යස්ථ බැල්මක් හෙළුවේය. මට ඒකට තව සාක්කි ඕනි. තව දැන ගන්න ඕනි දේවල් කීපයකුත් තියනවා. මට බලන්න ඕනි අර කපලා දැම්මයි කියපු තහනම් ගස් ටික.

ඇත්තටමද? ස්පිනී ඇසුවේය. මම පෙන්නනම් එයින් එකක්. මම පොඩි අවවාදයක් දෙන්නම්. ඒ දර්ශනය නම් ටිකක් දරාගන්න බැරිවෙයි.

මම නම් කියන්නේ මේ මිනිහා කියන වචනයක් වත් විශ්වාස කරන්න එපා කියලා, හම්ෆ්‍රීස් විරුද්ධ වුණේය. මේ මිනිහා බොරු කියන්නේ නිකං හුස්ම ගන්නවා වගේ.

මගේ වචන විශ්වාස කරන්න කියලා නෙවෙයිනේ මම කිවුවේ, ස්පිනී කීවේය. ඔයගොල්ලන්ගේම ඇස් විශ්වාස කරන්නකෝ.

මේක හරියට මායාකාර නළාකාරයාගේ පස්සෙන් යනවා වගේ වැඩක්, හම්ෆ්‍රීස් නොරිස්සුම් සහගත ලෙස ගිගුරුවේය. නමුත් ස්පිනී පසුපස්සෙන් යන අන් අයද සමඟ ඔහුද කැබින් කාමරයෙන් පිටතට පැමිණියේය.

තමා යන්නේ කොහිදැයි ස්පිනී හොඳහැටි දැන සිටියේ, දෙගිඩියාවකින් තොරවම පිරිසට නායකත්වය දෙමින් කැළය තුළට ගමන් කරන්නට වූයේය.

මෙන්න මෙතනයි තැන, ඔහු හඬගෑවේය. මේ දිහා බලන්න. හොඳට බලන්න.

දෙයියනේ, ස්කලී විසල් වූ දෑසින් යුතුව කීවාය. කොච්චර වටින ගහක්ද මේ!

ගහක් නෙවෙයි දැන් නම් මැරිච්ච ලී කොට ටිකක්, ස්පිනී ඇයව නිවැරදි කළේය.

වෘක්ෂය වනාන්තර භූමිය මත නිසළව වැතිරී තිබුණේය. එය අඩු තරමේ අඩි එකසිය පනහක් වත් දිගු එකක් වූයේය. එහි ක‍ඳෙහි විශ්කම්භය අඩි දහයකට වැඩි බවක් පෙන්වූයේය.




මේ රෙඩ්වුඩ් ගහ මෙතන තිබුණේ කාලය පටන් ගත්තු දවසේ ඉඳන්, ස්පිනී කීවේය. කෑදර මිනිස්සු ටිකක් ඇවිල්ලා කපලා යනකල්ම.

ස්පිනී එහි දුක්ඛිත ලෙස සිටගෙන සිටින අතරතුර ස්කලී හා මොල්ඩර් වෘක්ෂයේ දිග අතට ඇවිද ගියහ. ඔවුන් මීට පෙර මෙවන් යෝධයෙක් දැක තිබුණේ නැත.

මුවර් එහි පාදමේ උක්කුටියෙන් හිඳගත්තේය. එහි පැත්තක සටහන් කර තිබූ තැඹිලි පැහැති සළකුණ ඔහු ප්‍රවේසමෙන් අධ්‍යයනය කළේය.

කවුද මේ ගස් සළකුණු කරන්නේ? ස්කලී ඔහුගෙන් ඇසුවාය.

එක්සත් වනාන්තර සේවය, මුවර් පිළිතුරු දුන්නේය. අවසර තියෙන්නේ නිල් පාටින් එක්ස් අකුර සළකුණු කරපු ගස් කපන්න විතරයි.

මේ වගේ ගහක් කැපුවම ගොඩක් ලී ඉරා ගන්නත් පුළුවන්නේ, ස්කලී මතක් කළාය.

ඝන අඩි දාහක් විතර, ස්පිනී කීවේය. පොඩි, අළුත් ගස් කපනවාට වඩා ඒක ලේසියි. වියදමත් අඩුයි. මේ යෝධ ගස්වලින් මේ අය කුට්ටි පිටින් වැඩිපුර සල්ලි හොයනවා.

නවත්වනවා ඔය කතාව, නැත්නම් මට ඇ‍ඬෙයි දුකට, හම්ෆ්‍රීස් ව්‍යාජෝක්තියෙන් යුතුව කීවේය. ඔහු ස්කලී වෙතට හැරුණේය. මට දෙයක් කියන්න අමතක වුනා. මේ ගස් නින්ජලා ඒ ගොල්ලන්ගේම තීන්ත වලින් ගස්වල බොරුවට සළකුණු කරනවා.

මුවර් තැඹිලි පැහැති එක්ස් අකුරෙන් දෑස ඉවතට ගෙන හිස ඔසවා බැලුවේය. ඔහුගේ දෑසේ දැඩි බවක් දක්නට ලැබුණු අතර කටහඬද ඒ ආකාරම එකක් වූයේය. මේ ගස් අවුරුදු පන්සීයක් විතර පරණයි ස්ටීව්.

මොල්ඩර් වඩාත් උනන්දුවක් දැක්වූයේ ගසේ කපා ඇති කොටසක් කෙරෙහිය. මේ දිහා පොඩ්ඩක් බලන්න, ඔහු කීවේය.

ඔහුගේ කටහ‍ඬේ තිබූ උන්නදුව නිසා සියල්ලෝම ඒ දෙසට ඇදුණෝය. ඔවුන්ගේ දෑස් මොල්ඩර්ගේ ඇඟිල්ල අනුව යමින් ක‍ඳෙහි හරස්කඩෙහි පිටත සිට අරටුවෙහි ඇතුළට වන්නට පිහිටා ඇති වෘත්තාකාර මුදු තුළින් යවමින් ඇඟිල්ල නැවතුණු එක් තැනක නතර වූයේය. ඇඟිල්ල නැවතුනේ වෘත්තාකාර මුදුවලින් එක් ඝණ මුදුවක් මධ්‍යයෙහිය. එය අන් මුදුවලට වඩා ඝණ වූවා පමණක්ම නොව පාටින්ද වෙනස් වූයේ අන් මුදු මෙන් දුඹුරු පැහැ නොගත් කොළ මිශ්‍ර කහ පැහැයක් ගත්තේය.



මේ මුද්ද මොකක්ද? මොල්ඩර් ඇසුවේ මුවර්ගෙනි.

අනේ මන්දා. ඒ වගේ එකක් මම මීට කලින් දැකලා නෑ, වනාන්තර සේවා නිළධාරියා තෙපළේය.

මේවා අභ්‍යන්තර ලී මුදු. ඇතුළට වෙන්න තියෙන්නේ පරණම ඒවා, එහෙම නේද? ස්කලී ඇසුවාය.

ඔව්, මුවර් කීවේය. හැම මුදුවකින්ම පෙන්වන්නේ ගහ හැදෙන එක සෘතුවක්. ඒවා ගණන් කරලා ගහේ වයස කියන්න පුවවන්. ඒවා මැනලා කියන්න පුළුවන් උෂ්ණත්වයයි වර්ෂාපතනයයි ගැන. ඒත් මම මේ කහ පාට මුදුව ගැන නම් දන්නේ නෑ. පොඩි සාම්පලයක් ගන්න ඕනි.

අපේ සොබාදහම් චාරිකාව ඉවරද? හම්ෆ්‍රීස් ඇසුවේය. මොකද මට දැනගන්න දෙයක් තියනවා. මගේ කම්කරුවන්ට මොකද වු‍ණේ?

ඒක තමයි අපි මේ හොයන්න යන්නේ, ස්කලී කීවාය.

මේ ලී කොටයක් දිහා බලන් ඉඳලා? හම්ෆ්‍රීස් උදක්ම ඇසුවේය. මෙන්න මේ මිනිහවයි පරීක්ෂා කරන්න ඕනි. මේ මිනිහගේ අභ්‍යන්තරය බැලුවනම් තේරෙයි කෝච්චර පවුකාරයෙක්ද කියලා. මේ මිනිහා තමයි මගේ මිනිස්සුන්ව මැරුවේ.

මම හිතන්නේ නෑ මෙයා ඒක කරා කියලා, මොල්ඩර් ශාන්තව පැවසීය.

එහෙමද? ඒත් මම නම් හිතනවා, හම්ෆ්‍රීස් කියද්දී ඔහුගේ දෑතින් තුවක්කුව මිරිකා ගත්තේය. ඔහුගේ කටහඬ තර්ජනාත්මක එකක් වූයේය. මට ඕනි මේ මිනිහා අත්අඩංගුවට ගන්න. ඒ කියන්නේ මේ දැන්ම.

හදිස්සියක් නෑ, මොල්ඩර් කීවේය. මෙයා කොහෙවත් යන්නේ නෑනෙ.

මේක තියෙන තාක් කල් කොහේ යන්නද? ස්පිනී වෙත තුවක්කුව එල්ල කරමින් හම්‍ෆ්‍රීස් කීවේය. ඒත් මෙයාගේ යාළුවෝ දෙන්නා එකපාරටම මතුවුනා නම් කොහොමද? මතකද ඔයගොල්ලන්ගේ වනාන්තර සේවා නිළධාරියෝ අතුරුදහන් වුන විදිහ? ඔහු මුවර්ගෙන් ඇසුවේය. හිතාගන්න පුළුවන්නේ ගස් නින්ජලා ඒ අයට මොනවද කරේ කියලා?

මට මේ ගහෙන් සාම්පලයක් ගන්න ඕනි ස්ටීව්, මුවර් පිළිතුරු දුන්නේය.

මට තියනවා පවුල් සෑහෙන ප්‍රමාණයකට පිළිතුරු දෙන්න ඒ අයගේ ස්වාම් පුරුෂයෝ ගැන, හම්ෆ්‍රීස් තරයේ කියා සිටියේය. ඔයාටත් එහෙමයි ලැරී. මේ ගහෙන් ඒවට උත්තර ලැබෙන්නේ නෑ. අපිට තියනවා අපරාධයක් විසඳන්න. ඉක්මන් කළ තරමට තමයි හොඳ.

මේ ගස්වල මරණය ගැන තමයි සොයන්න තියන එකම අපරාධය, ස්පිනී කීවේය.

හම්ෆ්‍රීස් මුවර් දෙස බැලුවේය. ඉන්පසු මොල්ඩර් දෙස බැලුවේය. ඉන්පසු ස්කලී දෙස බැලුවේය.

ඔවුන් දිනීමෙහි තව එක් උත්සාහයක් ඔහු දැරුවේය. ‍මේ අහන්න, මේ මිනීමරුවට ඔයගොල්ලන්ව අන්දන්න දෙන්න එපා.

කිසිවෙක් කිසිවක් කීවේත් කළේත් නැත.

තමුසෙලා වගේ බයගුල්ලෝ හිතන්නේ එහෙම නම්, හම්ෆ්‍රීස් කෝපයෙන් කීවේය. ඔහු අනෙක් පස හැරී ඔවුන්ට පිටුපා වේගයෙන් ඇවිද යන්නට පටන් ගත්තේය.

ස්ටීව්, ඔය කොහෙද යන්නේ? මුවර් හඬගා ඇසුවේය.

මම යනවා ඔහේගේ ට්‍රක් එකට පයින්ම, හම්ෆ්‍රීස් තම උරහිසට උඩින් කීවේය. ගිහිල්ලා අවශ්‍ය අයට පණිවිඩේ කියලා යමක් කරන්න පුළුවන් මිනිස්සු ටිකක් මෙහෙ ගේනවා.

ස්ටීව්! මුවර් හඬගා ඔහුට කතා කළේය.

නමුත් ඔහු ඒවනවිට තුරු අතරින් අන්තර්ධාන වී ගොස් තිබිණි.

එයාට යන්න දෙන්න, ස්පිනී කීවේය. එයාම හොයාගනියි ඇත්ත නැත්ත. ඔහු සිනාසුනේය. ඉර බැහැලා ගියාම අනිවාර්යයෙන්ම එයා හොයාගනියි.