පරිච්ඡේද
Type REG para and send the SMS to 77000 and get paranormal updates to your mobile phone!


ෆොක්ස් මුල්ඩර් හමුවීමට යත්දී තමන්ට කුමන් ආකාරයේ අනපේක්ෂිත දෙයක‍ට මුහුණ දෙන්නට සිදුවේදැය ස්කලී කල්පනා කළාය.
ඇය කලබලයට පත්ව තිබුණේ නැත.
මුල්ඩර්ගේ කාර්යාංශය තිබුණේ එ‍ෆ්බීඅයි මූලස්ථානයේ පාදමේය. ඔහුගේ කාර්යාල දොරෙහි ඔහුගේ නම සඳහන් කර තිබුණේන නැත. ජෝන්ස් නොවිනි නම්, ස්කලී එතැන කිසිදා සොයා නොගනු ඇත.

ජෝන්ස් දොරට තට්ටු කළ නමුදු එය විවෘත කරන තෙක් බලා නොසිට ඇතුළට ගියේය. ස්කලීද, ඔහු පසුපස ආවාය.

එය වනාහී ස්කලී කිසි දිනෙක දැක නොමැති වර්ගයේ එෆ්බීඅයි කාර්යාලයක් වූයේය. එහි බිත්ති අසළ ගොඩ ගසා තිබුණු පොත්, පොළවේ සිට සිවිලිම දක්වා විය. පැරණි පුවත්පත් හා නොයෙක් වාර්තා හා කඩදාසි වලින් මේස පිරී තිබුණි. සමහරක් බිම වැටී තිබුණේ එවායෙහි යම් යම් වස්තූන් සහිත ඡායාරූපද යන්තමින් ප්‍රදර්ශනය කරමිනි. ස්කලී, බ්ත්තියේ අලවා තිබුණු පෝස්ටරයක් කියෙවුවාය. මට විශ්වාස කිරීමට උවමනාය. එහි ලියා තිබුණි.

ඔවුන් එහි ඇතුල් වන විට මුල්ඩර් මේසයක් අසළ සිටගෙන සිටියේය. දැඩි ආලෝකයකට මධ්‍යගත කරන ලද ඡායාරූප කදාවක් නිරීක්ෂණය කිරීමෙහි ඔහු පසුවිය. එයින් දෑස ඉවත් කරගෙන ඕනෑවට එපාවට මෙන් තම අමුත්තන් පිළිගැනීමට ඔහු සූදානම් විය.

ස්කලීට ප්‍රථම වරට මුල්ඩර් දෙස බැලීමට හැකිවිය. නමුත් එය කිසිසේත්ම ඔහුව හොඳින් තේරුම් ගැනීමට ප්‍රමාණවත් වූයේ නැත. නොගැලපෙන අච්චු දෙකක් එකට හා කරන්නට යත්න දරන්නේ යම් සේද, එසේම එයද අමාරු කර්තව්‍යයක් වූයේය.

ඔහුගේ තරුණ මුහුණ, වඩාලාත්ම ගැටවර ස්වාභාවයක් ගත්තේ එ‍ෆ්බීඅයි නිළදාරියෙකුට නොතරම් ආකාරයෙනි. කාර්යාංශය, ප්‍රිය නොකරන ආකාරයේ දිගු කෙස් කළඹක් ඔහු සතුවිය. ඔහුට පහසුවෙන්ම රූපවාහිනී නිවේදකයකු විය හැකිව තිබුණි.

නමුත් ඔහුගේ දෑස්.

යම් අමනුෂ්‍ය පරිගෘහිත පෙනුමක් සම්මිශ්‍රණය වූ තලතුනා ප්‍රඥාවන්ත බවක් ඒවායින් ප්‍රාදුර්භූත වූයේය.

සමාවෙන්න කපටි සිනහවක් පා ඔවුන් පිළිගනිමින් මුල්ඩර් කීවේය. සාමාන්‍යයෙන් මෙහාට කුණුකන්දල් ඇරෙන්න වෙනත් දේවල් එනවා අඩුයි.

ජෝන්ස් කෙළින්ම මාතෘකාවට බැස්සේය. මුල්ඩර් මෙන්න ඔබගේ අළුත් සහායිකාව. හඳුනාගන්න, ඩානා ස්කලී. මේ තමයි ෆොක්ස් මුල්ඩර්.

සහායිකාවක්? මගේ වැදගත්කම පහුවෙලා හරි තේරුම් ගිය එක දැනගන්න ලැබීම සතුටක් මුල්ඩර් ස්කලී දෙසට හැරුණේය. ඇත්තටම ස්කලී, ඔයා කාත් එක්කද අවුලක් දාගත්තේ මේ වැඩේට හවුල් වෙන්න?
ස්කලී තම ඉවසීම මනා ලෙස පවත්වාගෙන සිටියාය. ඇයට කලින් සිටම හැඟී ගියේ මුල්ඩර් විසින් තමාව තම ඉවසීමේ සීමාවෙන් පිටතට ඇදගැනීමට උත්සාහ දරන බවකි.

ඇත්තටම මම බලාපොරොත්තු වෙනවා ඔබත් සමඟ ඉදිරියේදී වැඩ කරන්න.

ඇත්තට? මුල්ඩර් ඇසුවේය. ඔහු ඇගේ දෑස දෙස කෙළින්ම බැලුවේය. මට නම් හිතන්නේ ඔයාව මෙතනට ඔත්තුකාරයෙක් විදිහට එවලා වගේ.

ස්කලීගේ ආචාරශීලී සිනහව අතුරුදන් වුනි. ඔබට මගේ සුදුසුකම් ගැන සැකනම්, මම ඒවා එකින් එක පෙන්වන්න කැමතියි. ඇය කීවාය.

පිළිතුරක් දෙනවා වෙනුවට මුල්ඩර් ලියකියවිලි හාරාඅවුස්සන්නට වූයේය. අවසානයේදී ඔහු ඝන ලිපිගොනුවක් ඔසවා ගත්තේය.

“’අයින්ස්ටයින්ගේ පරස්පරවිරෝධී නිවුන් න්‍යාය - නව අර්ථකථනයක්,’” ඔහු එය කියවූයේය. ඩානා ස්කලීගේ ආචාර්ය උපාධි නිබන්ධනය. මේකත් සුදුසුකමක් වෙන්න ඇති. අයින්ස්ටයින් ප්‍රතිරචනය.
මුලින්ම ඔබ ඕක කියෙව්වාද? තම කටහ‍ෙඬ් වේගවත් බව අඩුකර ගැනිමට යත්න නොදරාම ඇය ඇසුවාය.

ඇත්ත වශයෙන්ම, මුල්ඩර් කීවේය. මේක හරි අපූරු නිබන්ධනයක්. ඒත් මට මෙහෙදී ගනුදෙනු කරන්න සිද්ධවෙන බොහෝ සිදුවීම් වල භෞතික විද්‍යා න්‍යායයන් ඒ අයුරින්ම ක්‍රියාත්මක වෙනවා දකින්නට ලැබෙන්නේ නෑ.

ඔබ දන්නවාද? ඒජන්ට් ස්කලී කියන්නේ සුදුසුකම් ලත් වෛද්‍යවරියක්, ජෝන්ස් කීවේය. ඇය දැනට ඇකඩමියේ ඉගැන්වීම් කටයුතු සිදුකරනවා.

ඔව් මම දන්නවා, මුල්ඩර් පැවසීය. හොඳයි අපට දැනගන්න පුළුවන් වෙයිද මෙන්න මේක සම්බන්ධව ඇයගේ වෛද්‍ය විද්‍යාත්මක මතය මොකක්ද කියලා?

මුල්ඩර් තම කාර්යාලයේ ආලෝක පහන් නිවා දමා ඡායාරූප කදාව පණ ගැන්වීය. ඔහු තමා විසින් කලින් නිරීක්ෂණය කරමින් සිටි ඡායාරූපය එයට ඇතුල් කළේය. එවිට එම රූපය බිත්ති තිරයේ දිස් විය.

කැළෑවක් තුළ එළිමහන් තැනක මුනින් අතට වැටී මියගොස් සිටින තරුණියකගේ රූපයක් ස්කලී දුටුවාය.
ඔරිගන් වල කාන්තාවක්. වයස විසි එකයි. මරණයට නිශ්චිත හේතුවක් නෑ.

ඔහු දෙවැනි ඡායාරූපයද ඇතුල් කළේය. මේ ඇයගේ පිට පෙදෙසේ පහළ තිබුණු පැහැදිලි සළකුණු දෙකක්. ඩොක්ටර් ස්කලී, ඔබට පුළුවන්ද ඒවා හඳුනා ගන්න?

ස්කලී තිරය දෙසට වඩාත් ලංවී එම සළකුණු වඩාත් උන්නදුවෙන් අධ්‍යයනය කළාය.

සමහර විට මේවා ඉඳිකටු හෝ ඇල්පෙනෙති තුඩු වලින් ඇති වූ ඒවා විය හැකියි. ඇය කීවාය. සතෙකුගේ සපා කෑමක්, එහෙමත් නැත්නම් විදුලිය වැදීමක් වෙන්නත් පුළුවන්.

රසායන විද්‍යාව සම්බන්ධයෙන් ඔබේ දැනුම මට්ටම කොහොමද? මුල්ඩර් ඇසුවේය. මෙන්න මේක, ඒ තුවාලය වටේ තිබුණු ද්‍රව්‍යයක්.

අසුරු ගසන්නාක්මෙන් අසන ප්‍රශ්න වලට පිළිතුරු දීමට ඇය ඊළඟ ඡායාරූපය අධ්‍යයනය කළාය. තමා පළමු වසර ශිෂ්‍යාවක්ව සිටි කාලයේ සිට මේ දක්වා එවැන්නක් ඇය දැක තිබුණේ නැත.

ඇය මඳක් තම ‍තොල් සපා ගත්තාය. ඒක ඝන ද්‍රව්‍යයක්. ඒත් මම මීට කලින් ඒ වගේ දෙයක් දැකලා නෑ. ඒක මොකක් හරි කෘතීම ප්‍රෝටීන් වර්ගයක්ද?

නොදන්නා බව පෙන්වීමට, මුල්ඩර් තම දෙවුර මඳක් ඉස්සීය. අනේ මන්දා. මාත් ඒ වගේ දෙයක් දැකල නෑ. බලන්න මේක දිහා-මේක දකුණු ඩැකෝටා ප්‍රාන්තයේ ස්ටර්ජිස් වලින්.

ඔහු නවතම ඡායාරූපයක් දර්ශනය කළේය. එවර එහි දිස්වූයේ ස්ථුල, යතුරුපැදි කරුවෙකුගේ මළ සිරුරකි. එහි පෙර වර්ගයේම සළකුණු දෙකක් සිරුරේ විය.




තවත් ඡායරූපයක් දර්ශනය වූයේය. මිනිසෙක් හිම මත මුනින් අතට වැටී සිටියේය. මෙහිද එම සළකුණු සිරුරේ එම ස්ථානයේම තිබෙනු දක්නට ලැබුණි. ටෙක්සාස් ප්‍රාන්තයේ ෂැම්රොක් වලින්. මුල්ඩර් කීය.
මේ ගැන ඔබේ මොකක් හරි නිගමනයක් තියෙනවද? ස්කලි ඇසුවාය.

මටද? මට නම් සෑහෙන්න නිගමන තියෙනවා, මුල්ඩර් කීවේය. නමුත් ඔබටත් මොකක් හරි නිගමනයක් ඇතිවෙන්න පුළුවන්. කාර්යාංශය තමන් කියන දේවල් ගන්න නොගන්න වර්ගයේ නිගමනයක්. කාර්යාංශය, මේ පරීක්ෂණය තේරුම්ගත නොහැකි අද්භූත වර්ගයට ඇදලා දාන නිගමනයක්. කාර්යාංශය මේ පරීක්ෂණ වසා දමලා අමතක කළ යුතු වර්ගයට දාන නිගමනයක්.

හදිසියේම තම බැන වැදීම මොහොතකට නතර කළ මුල්ඩර් දවසේ අමාරුතම ප්‍රශ්නය ස්කලීගෙන් ඇසුවේය. ඔබ පිටසක්වළ ජීවීන් විශ්වාස කරනවාද?

පිළිතුරක් දීමට පෙර ස්කලී මඳ වේලාවක් කල්පනා කළාය. මට ඒ දේවල් ගැන එච්චර උනන්දුවක් තිබුණේ නෑ. ස්කලී කීවාය.

විද්‍යාඥයෙක් විදිහට වත්?, මුල්ඩර් පිළිතුරක් බලාපොරොත්තුවෙන්ම ඇසුවේය.

තර්කානුකූලව නම් මම විශ්වාස කරන්නේ නෑ. අවිනිශ්චිත ස්වරයකින් ස්කලී කීවාය. මේ පුද්ගලයා සමඟ ඉදිරියේදී බොහෝ ගනුදෙනු කිරීමට ඇයට සිදුවනු ඇත. ලැබුණු අවස්ථාව ලත් තැනම ලොප් කරගැනීමට ඇයට වුවමනා වූයේ නැත. අභ්‍යවකාශය අතිවිශාලයි. ඒක තරණය කරන්න අවශ්‍ය ශක්තිය-

පොඩ්ඩක් හෝව්, මුල්ඩර් ඉස්සර විය. අර ගෑනු ළමයා ඔරිගන් වල. එයා තමයි හතරවෙනියා එයාගෙම ඉස්කෝලෙ එකම පන්තියක හිටපු අයගේ අභිරහස් මරණ ලයිස්තුවට එක්වුන. අපි දන්න විද්‍යාවට දෙන්න බෑ ඒවට උත්තර. ඉතින් අපි විද්‍යාව අභිබවා යා යුතු නැද්ද? ඔයගොල්ලො කියන අමුතු දේවල් ගැන අපි අවධානය යොමු කළ යුතු නැද්ද?

ස්කලීට තවදුරටත් ඉවසාගෙන සිටීමට හැකිවූයේ නැත. ඇයගේ ශෛලිය සුකොමාල වූවක් නොවීය.
අපි දන්නෙ නැත්නම් අර ගෑනු ළමයා මැරුණේ කොහොමද කියලා, ඇය පවසාගෙන ගියාය, ඒකට හේතුව කාය විච්ඡේද පරීක්ෂණයෙදි අපිට මොනවා හරි මඟ හැරීම වෙන්න පුළුවන්. ඒක නම් අනිවාර්යයෙන්ම කිසිම පිළිවෙලක් නැති මරණ පරීක්ෂණයක් වෙන්න ඕනි. අමුතු කියලා මම නම් අර්ථකථනය කරන්නේ එක දෙයයි. විද්‍යාවේ පරාසයන්ගෙන් පිටත, යමකට පිළිතුරු ඇති කියලා හිතනවා නම් ඒකයි මම දකින්නේ අමුතු දෙයක් විදිහට. පිළිතුරු විද්‍යාව තුළම තියනවා. ප්‍රශ්නෙ තියෙන්නෙ පිළිතුරු සෙවීමට අවශ්‍ය තැන බලන්නේ නැති එක.

කුල්මත් සිනහවක් මුල්ඩර්ගේ මුහුණෙහි ඇඳී ගියේය.

මම සතුටු වෙනවා ඔබ එහෙම හිතන එක ගැන, ඒජන්ට් ස්කලී, ඔහු කීවේය. මට විශ්වාසයි ඒජන්ට් ජෝන්ස් පවා එකඟ වෙයි ඔබ සමඟ. අනිත් එක, ඒකට තමයි F.B.I කියන එකේ ‘I’ කියන එක තියෙන්නේ. පරීක්ෂණ කිරීම තමයි අපේ රාජකාරිය. අපි මුලින්ම ඒක ඒක කරලා ඉන්න එක හොඳයි මගෙ හිතේ.

මුල්ඩර් ඡායාරූප ප්‍රක්ෂේපණ යන්ත්‍රය ක්‍රියාවිරහිත කොට කාමරයේ ආලෝකය දැල්වූයේය.

හෙට උදේ පාන්දරින්ම හමුවෙමු ස්කලී, ඔහු උ‍ද්‍යෝගිමත් ලෙස පැවසුවේය. හරියටම උදේ අටට අපි ඔරිගන් බලා පිටත් වෙනවා.








පොත මිලදී ගත හැකි තැන්

එම් ඩී ගුණසේන දිවයින පුරා ශාඛා 
සරසවි දිවයින පුරා ශාඛා 
ගොඩගේ - මරදාන
සමයවර්ධන - මරදාන/කිරිබත්ගොඩ 
දයාවංශ ජයකොඩි - මරදාන 
සූරිය - මරදාන
ලේක්හවුස් - කොටුව

ඉදිරියේදී අනිකුත් පොත්හල් වලින්ද මිලදී ගත හැක.

පිටපතක මිල රු. 300/=

(තැපැල් මගින්ද ලබා ගත හැක. http://www.udasri.com/)




ඩානා ස්කලී තමා ඉදිරිපස ඇති මෘත ශරීරය වෙත නැඹුරු වී සිටියාය. එය කාන්තාවකගේ මෘත ශරීරයක් නොව සුදුමැලි වී ගිය පිරිමි මළ සිරුරක් විය.

ඇයගේ මුහුණෙහි කිසිදු හැඟීමක් ප්‍රකට වූයේ නැත. වම්බටු ගෙඩියක් දෙස බලා ඉන්නවාක් මෙන් ඇය එදෙස බලාගෙන සිටියාය. එය හුදෙක් දෛනික කර්තව්‍යයක් බවට පත්වී තිබුණි.

ස්කලී වනාහී ශෝභමාන තරුණියක් වූවාය. නමුදු ඇයගේ රැකියාව ලැබීමට හේතුවූයේ එම පෙනුම නොව ඇගේ විශිෂ්ට බුද්ධිය විය. ඇය ශූර, එමෙන්ම එය පෙන්වීමටද නොපැකිළෙන වර්ගයේ තරුණියක් වූවාය. ඇය රැකියාව සඳහා පැමිනෙන කාලයේ, එ‍ෆ්බීඅයි ආයතනයද ඇය වැනි කෙනෙකු සොයමින් සිටියේය.

ඇයගේ මෑත කාලීන කාර්යය වූයේ එ‍ෆ්බීඅයි පුහුණු ඇකඩමියේ පන්තියක උගැන්වීම වූයේය. අද දින ඇය මෘත ශරීරයක් යොදා ගනිමින්, විදුලිය වැදීමනේ සිදුවූ මරණයක් හඳුනා ගන්නේ කෙසේද යන්න උගන්වමින් සිටියාය. ඇයගේ දේශන ඉතා පැහැදිලි වූයේය. නමුදු තාක්ෂණික කරුණු විස්තර කිරීමේදී විදුලියක් මෙන් ඇය වේගවත් වූවාය. ඇයගේ ශිෂ්‍යයන්ට ඒවා ග්‍රහණය නොවුනි නම් කණගාටුවට කරුණක් බව පැවසීම අතිශයෝක්තියක් නොවනු ඇත. ඔවුනට එවිට ‍දක්ෂ එ‍ෆ්බීඅයි නිළදාරීන් වීම අපහසු වනු ඇත.
විදුලිය වැදීමේදී හෘද ස්පන්දනයට සහ ස්නායු පද්ධතීන්ට හානි සිදුවෙනවා. හෘදයේ ඇතුළත සියුම් පටලවල හා සමස්ථානික මහා ධමනියේ ඉරී යාමෙන් මරණය ඇති වීමට ඉඩ තිබෙනවා. අප විදුලිය හා විවිධ කෝණයන් ඔස්සේ හැසිරීමට ඉඩකඩ තිබෙනවා. උදාහරණයක් විදිහට, මම අකුණක් වැදිලා බේරීමට ඉඩ තිබෙන අතරේ තව කෙනෙක් විදුලි කෙවෙනියකට ඇඟිල්ල දාන්න ගිහිල්ලා මරණයට පත් වෙන්න පුළුවන්. අන්න ඒක නිසා ආත්මාරක්ෂක කුඩා විදුලි විදිනයක් නිසා වුනත් මරණයක් සිදු වෙන්න පුළුවන්. එතකොට ඔබ රතුපාට රවුම්...

ස්කලී මඳකට දේශනය නැවැත්වූවාය. වෙනත් නිළදාරියෙක් පන්ති කාමරයට ඇතුල්වී තිබුණි. ඇයගේ සුමට ඇහිබැම මඳක් රැළි ගැසුණි. කිසිවෙකු ඇගේ පන්තියට බාධා කරනවා දැකීමට ඇය කැමති වූයේ නැත. නමුදු, නිළදාරියා දුන් කඩදාසිය කියවද්දී තම කෝපය පහව යනු ඇයට දැනුනි.

වොෂින්ටනයේදී නොවරදවා 16 වන පැයේදී විශේෂ නියෝජිත ජෝන්ස් හමුවන්න

ස්කලී මඳක් දරදඬු වුවත් අණ පිළිපැදීම ඇය අතින් නිසියාකාරව සිදුවුනි. ඒ නිසාම ඇය එෆ්බීඅයි ආයතන‍යේ කැපී‍ ‍පෙනෙන අය අතර වූවාය.

හරියටම සවස හතර වෙත්දී ස්කලී එෆ්බීඅයි මූලස්ථානයේ වූවාය. ඇය තම හඳුනාගැනීමේ ලාංඡනය එහි පිළිගැනීමේ නිළදාරිනියකට දැක්වූවාය. මට හමුවීමක් තියනවා-

ඒජන්ට් ස්කලී ඇයගේ පිටුපසින් ගැඹුරු කටහඬක් කීවේය.

විසල් සිරුරකින් හෙබි සිත්ගන්නාසුළු මිනිසෙක් ඇගේ පසුපසින් වූයේය. ඔහුට අවුරුදු පනහක් පමණ බැව් බැලු බැලුමටම පෙනින. මීට පෙර කිසිදිනෙක ඔහුව දැක නැති මුත් ඒ කවුද කියා ඈ අනුමාන කළාය.
මම ජෝන්ස් ඔහු පැවසුවේය. මාත් එක්ක එන්න. අපි දැනටමත් පරක්කුයි

ඔහු ඇයව හිස්වූ දිගු ශාලා පරිශ්‍රයක් අතරින් කැඳවාගෙන ගියේය. කිරිගරුඬ පොළව මත වැදුනු ඔවුන්ගේ අඩි ශබ්ද දෝංකාර දුන්නේය. ඔහුගේ දිගු පියවර හා සමව යන්නට ස්කලී හට අර්ධ ධාවනයක යෙදෙන්නට සිදු වුණි.

මම මොකක් හරි ප්‍රශ්නයකට මැදි වෙලාද? ඇය ඇසුවාය.

ඔබට සම්මුඛ පරීක්ෂණයක් තියනවා ජෝන්ස් කීවේය. ඉතා ඉහළ මට්ටමේ එකක්.

ජෝන්ස් ඇයව විශාල ද්ව්ත්ව දොරක් මැදින් කැඳවාගෙන ගියේය. ඇතුළත වූයේ සම්මන්ත්‍රණ කාමරයකි. ඕවලාකාර මේසයක අවුරුදු හැට ගණන් වල පසුවෙතැයි කිව හැකි මිනිසුන් සයදෙනෙකු හිඳගෙන සිටියෝය. ඔවුන්ගේ බලවත්කම දැන ගැනීමට ස්කලී හට ඒ ඒ අයගේ තනතුරු නාම අවශ්‍ය වූයේ නැත. ඔවුන්ගෙන් නික්මෙන තේජසම එය මොනවට කියාපෑවේය.

ජෝන්ස්, ස්කලීට හිඳගැනීමට පුටුවක් පෙන්වා ඊට පසුපසින් සිටගෙන සිටියේය.
මුලින්ම කටහඬ අවදි කළ මිනිසා, එතැන සිටියවුන්ගෙන් වයස්ගතම තැනැත්තා බව පෙණුනි. නමුදු වයස විසින් ඔහුගේ ස්ථිරසාර බැල්ම මඳකුදු අඩුකර තිබුණේ නැත. ස්කලී හට මඳ අපහසුතාවයක් දැනුණි. එම වදන් වල කිසිදු චංචල භාවයක් තිබුණේ නැත. ඒවා වානේ මෙන් සවිමත් බවක් පළ කළේය.

ඒජන්ට් ස්කලී, ඔබගේ පැමිණීමට ස්තුතියි. මිනිසා කීවේය. ඹබ මෙම කාර්යාංශය සමඟ වසර දෙකක සිට ඉන්නවා.

ඔව් සර්, ස්කලී කීවාය.

ඔබ අභ්‍යාවකාශ විද්‍යාව පිළිබඳ උපාධි අපේක්ෂිකාවක්, මිනිසා පවසාගෙන ගියේය. ඔබ ඊට පසුව වෛද්‍ය විද්‍යාව පිළිබඳ උපාධියක් ලබනවා. නමුත් ඔබ වෛද්‍යවරියක් වෙන්නේ නැතිව භෞතික විද්‍යාව පිළිබඳ උසස් උපාධියක් ලබනවා. කරුණාකරලා මේ විවිධාකාර අධ්‍යයන රටාව පිළිබඳ ඔබට පැහැදිලි කිරීමක් කරන්න පුළුවන්ද?

ඇත්තටම සර් මම හිතන්නෙ අපේ පවුලේ හැමෝම වගේ පොත් ගුල්ලෝ නිසා වෙන්න ඇති. ස්කලී කීවාය. ඒකට එරෙහිව සටන් වදින්න වෙන්න ඇති මම විද්‍යාව තෝරා ගත්තේ.

ඇයගේ පුංචි විහිළුව එකතැනම පල්වෙනු ඇයට දැනුණි. මඳහසකුදු එම කාමරයෙන් නැඟුනේ නැත.
ස්කලී තම උගුර පාදා පවසාගෙන ගියාය. වෛද්‍ය විද්‍යාලෙට ගියාට පස්සේ, මම කල්පනා කළා ජාතික අභ්‍යාවකාශ ආයතනය වෙනුවෙන් පර්යේෂණයක් කරන්න. මම හිතුවා භෞතික විද්‍යාව ඉගෙන ගැනීම එයට උදව්වක් වෙයි කියලා. නමුත් මම පස්සෙ තීරණය කළා එෆ්බීඅයි ආයතනයට සම්බන්ධ වෙන්න. එෆ්බීඅයි ඇකඩමියෙදි තමයි මම භෞතික විද්‍යා උපාධිය සම්පූර්ණ කළේ.

ඉන්පසු මේස‍ය වටා වාඩි වී සිටි මිනිසුන් එය මත වූ ඝන ලිපිගොනු වල පත්‍ඉරු පරීක්ෂාවෙහි නිමග්න වූහ. එම කළු සුදු කොළ වල තම මුළු ජීවිතයම ඇති බව ස්කලී දැන සිටියාය. දීර්ඝ කාලයකට, එහි වූයේ පිටු පෙරලෙනවිට නැගෙන කඩදාසි ශබ්දය පමණක් විය.

එක් වරම දෙවැනි පුද්ගලයෙක් ප්‍රශ්නයක් ඇසුවේය. ඔබ ඒජන්ට් ෆොක්ස් මුල්ඩ‍ර් කියා කෙනෙක් හඳුනනවාද?

ඔව්, මම දන්නවා, ස්කලී කීවාය. ඒ නම, ඇයට ඈතින් ඇසුණු සීනු නාදයක් මෙන් යමක් මතක් කළේය.
කොහොමද? දෙවැන්නා ඇසුවේය.

ඔහුගේ ප්‍රසිද්ධිය නිසා, ස්කලී පිළිතුරු දුන්නාය. සමහර වෙලාවට අනික් අය එයා ගැන කතා වෙනවා මට ඇහිලා තියෙනවා. ඇකඩමි එකේ අය එයාට භූත මුල්ඩර් කියලායි කියන්නේ.

ජෝන්ස් බාධා කළේය. ඒක නම් වැරදි චිත්‍රයක්. මුල්ඩර් කියලා කියන්නේ සුපිරි ඒජන්ට් කෙනෙක්. ඔහුට හාවර්ඩ් සහ ඔක්ෆර්ඩ් වලින් මනෝ වීද්‍යාව සඳහා ගෞරව උපාධි තියනවා. අනුක්‍රමික මිනීමරුවන් සහ ඔවුන්ගේ රහස් කියන ඔහුගේ නිබන්ධනය නිසා අපිට තිබුණු අමාරුම පරීක්ෂණයක් විසඳන්න පුළුවන් උනා. අපරාධ අංශයේ ඉන්න හොඳම විශ්ලේෂකයා ඔහු විය හැකියි සමහර වෙලාවට.

ජෝන්ස් හට කියන්නට හැකි වූයේ එපමණකි. පළමු මිනිසා ගරුසරු නැතිවම ඔහුට බාධා කළේය. අවාසනාවකට ඒජන්ට් මුල්ඩර් මේ විකාර ව්‍යාපෘතියකට සෑහෙන උනන්දුවක් දක්වනවා. ඇත්තටම ඒක උනන්දුවකට වඩා පිස්සුවක් කිව්වත් වරදක් නෑ. ඔබ අහලා තියෙනවද එක්ස් ෆයිල්ස් ගැන?

යන්තමින් සර්, ස්කලී කීවාය. මම දන්න විදිහට ඒවා අදාල වෙන්නේ අද්භූත විස්තර කළ නොහැකි අස්වාභාව්ක සිදුවීම් සම්බන්ධයෙන්.

සරළවම කිව්වොත් වැඩකට නැති අවතාර කතා, දෙවැනි මිනිසා ගිගුරුවේය.

එවිට පළමු මිනිසා ඔහු දෙස දැඩි බැල්මක් හෙළා ස්කලී දෙසට හැරුණේය. ඒජන්ට් මුල්ඩර් ඔහුගේත්, කාර්යාංශයේත් කාලය මේ ව්‍යාපෘතිය සඳහා යොදවන ලෙස අපෙන් දැඩි ලෙස ඉල්ලා සිටිනවා. වෙන ව්‍යාපෘති භාරගන්න ඔහු සූදානම් නැහැ.

පළමු මිනිසා, ස්කලී මේ දේවල් හොඳින් ධාරණය කරගන්නා තෙක් සිටියේය. පසුව නැවත හෙතෙම අවතීර්ණ වූයේය. ස්කලී මෙනෙවිය, ඔබගේ අතිවිශිෂ්ට සුදුසුකම් නිසා ඔබ මින් පසුව මුල්ඩර්ගේ සහායිකාව ලෙස මේ එක්ස් ෆයිල්ස් පරීක්ෂණ සඳහා එක් විය යුතුයි. මේ පරීක්ෂණ සම්බන්ධයෙන් ක්ෂේත්‍ර වාර්තා ඔබ විසින් සැකසිය යුතුයි. එසේම ඔබ මේ පරීක්ෂණ සම්බන්ධයෙන් ඔබගේ අවංක වූත් ඍජු වූත් මතය පළ කළ යුතුයි. එසේම මෙම වාර්තා ඔබ මේ අපගේ මෙම කණ්ඩායමට පමණක්, හොඳින් මතක තබා ගන්න, මෙම කණ්ඩායමට පමණක් ඉදිරිපත් කළ යුතුයි.

ස්කලී තම පැවැරුම ක්ෂණිකව තේරුම් ගත්තාය. එහි කිසිදු ප්‍රහේළිකාවක් වූයේ නැත.

සර් ඒ කියන්නේ මේකෙන් ඔබ බලාපොරොත්තු වෙන්නේ එක්ස් ෆයිල්ස් වල තියෙන බොරුව එළිදරව් කිරීමද? ඇය ඇසුවාය.

එක්වරම එහි දැඩි නිශ්ශබ්දතාවයක් විය.

පළමු මිනිසා හඬ අවදි කලේය, ඒජන්ට් ස්කලී, අප වීශ්වාස කරනවා ඔබ මේවා සම්බන්ධ විද්‍යාත්මක විශ්ලේෂණයන් නිවැරදි ආකාරයෙන් අපට ඉදිරිපත් කරයි කියලා. ඔබගේ වාර්තා මඟින් එක්ස් ෆයිල්ස් වල සැක සහිත තැනක් විසඳන්න පුළුවන්නම්, එය කරන්න. මට විශ්වාසයි අපිට ළඟඳීම ඒජන්ට් මුල්ඩර්ව මීට වඩා ප්‍රයෝජනවත් වැඩක යොදවන්න පුළුවන් බව. ඒ වගේම ඔබවත්. මේ වැ‍ඩේ කළොත් අනිවාර්යයෙන්ම ඔබේ වෘත්තිය වඩා සමෘධිමත් වේවි.

ඔහු තම වදන් කෙටි කළේ මතු ප්‍රශ්න සඳහා මඟ එයින් අහුරමිනි.

ඔව් සර්.තමාට කිව හැකි එකම දෙය ස්කලී කීවාය.

ඒජන්ට් ජෝන්ස් ඔබට සියළු විස්තර කියා දෙයි, පළමු මිනිසා කීවේය.

අපි බලාපොරොත්තු වෙනවා ඔබගේ වාර්තා, දෙවැනි මිනිසා පැවසුවේය. ඔබගේ අතිශය ඍජු වාර්තා. වචනයේ පරිසමාප්ත අර්ථයෙන්ම ඔබගේ අදහස් නොවළහා පැවසිය යුතුයි. කිසිම දෙයක් අතපසු නොකළ යුතුයි. හොඳින් මතක තබා ගන්න.

ජෝන්ස් සමඟ කොරිඩෝරයට පැමිණෙන තුරු ස්කලී මුවින් නොබැන සිටියාය. ඇත්තටම මුල්ඩර් කියන්නේ මොනවගේ කෙනෙක්ද? ඇය ජෝන්ස් ගෙන් ඇසුවාය.

ජෝන්ස් තම තොල් මඳක් සපා ගත්තේය. මුල්ඩර්? දක්ෂයි. අතිශයින්ම බුද්ධිමත්. ඒ වගේම ඔහු අතිශයින්ම නිදහස් භාවය ප්‍රිය කරන කෙනෙක්. ලේසි පාසු කෙනෙකුත් නෙමෙයි. කෙටියෙන්ම කිව්වොත් එෆ්බීඅයි සම්මතයන් අභියෝගයට ලක් කරන කෙනෙක්. ඔහු මඳක් නැවතුනේය. මට හොඳටම විශ්වාසයි ඔයා එන්නේ මොකාටද කියලා ඔහු මේ වෙන කොටත් දන්නවා ඇති.

ස්කලී, ඇයට හැකි ඉහළම අහිංසක පෙනුමෙන් ජෝන්ස් දෙස බැලුවාය. මම මොකාටවත් එන්න හදනවා නෙමෙයි සර්. ඉහළින් එන නියෝග පිළිපදින එක විතරයි.








පොත මිලදී ගත හැකි තැන්

එම් ඩී ගුණසේන දිවයින පුරා ශාඛා 
සරසවි දිවයින පුරා ශාඛා 
ගොඩගේ - මරදාන
සමයවර්ධන - මරදාන/කිරිබත්ගොඩ 
දයාවංශ ජයකොඩි - මරදාන 
සූරිය - මරදාන
ලේක්හවුස් - කොටුව

ඉදිරියේදී අනිකුත් පොත්හල් වලින්ද මිලදී ගත හැක.

පිටපතක මිල රු. 300/=

(තැපැල් මගින්ද ලබා ගත හැක. http://www.udasri.com/)